Azərbaycan Ərzaq və Kənd Təsərrüfatı Muzeyi və Şəbəkəsinə töhfə verib
16 oktyabr 2025-ci il tarixində BMT-nin Ərzaq və Kənd Təsərrüfatı Təşkilatının (FAO) Baş qərargahında İtaliya prezidenti Sercio Mattarellanın iştirakı ilə Ərzaq və Kənd Təsərrüfatı Muzeyi və Şəbəkəsinin (Food and Agriculture Museum and Network – FAO MuNe) açılış mərasimi keçirilmişdir. Azərbaycan adından Muzeyə Leyla Əliyevanın MAMA – Ana Təbiət seriyasından “Mavi delfinlər” əsəri təqdim edilmişdir.
Xatırladaq ki, sözügedən əsər 2025-ci ilin may ayında Romanın MAXXI muzeyində keçirilən “MAMA – Ana təbiət” sərgisi zamanı nümayiş olunmuşdur. Əsər sərginin açılış mərasimində iştirak edən FAO-nun Baş direktoruna Leyla xanım tərəfindən hədiyyə edilmişdir. Baş direktor Qu Dongyu şəxsən əsərin FAO Muzeyinə təqdim edilməsi təşəbbüsünü irəli sürmüşdür.
Məlumat üçün bildirək ki, Şəbəkə FAO üzvləri və tərəfdaşları arasında əməkdaşlıq və dialoq mərkəzi kimi xidmət edir, ölkələr və regionlar arasında tərəfdaşlığı təşviq edir. Şəbəkə yerli, milli və qlobal təcrübələri nümayiş etdirir, bilik mübadiləsi, məlumatlılığı artırmaq, kənd təsərrüfatı qida sistemlərini və ənənələrini qorumaq və davamlı təcrübələri təşviq etmək üçün virtual məkan təklif edir. O, həmçinin dünya miqyasında qida və kənd təsərrüfatı ilə bağlı mədəniyyətlərin, irsin və ən yaxşı təcrübələrin mübadiləsini asanlaşdırır.
1300 kvadrat metrlik sahəsi olan FAO MuNe ənənəvi mənada muzey deyil. O, qida təhlükəsizliyi, dayanıqlılıq, qidalanma və hər şeydən əvvəl iqlim böhranı və silahlı münaqişələr tərəfindən getdikcə daha çox təhdid edilən aqro-ərzaq sistemlərinin gələcəyi kimi mürəkkəb məsələləri hamı üçün əlçatan etmək üçün hazırlanmış dinamik bir təhsil platforması olmağı hədəfləyir.
.jpg)
.jpeg)
.jpg)
.jpg)
.jpeg)
.jpeg)
.jpeg)