2016-06-17
İtaliyanın “Il Giornale” qəzetində Azərbaycan səfirinin ermənipərəst jurnalistin yazısına cavab məktubu dərc olunmuşdur

19 may tarixində İtaliyanın “Il Giornale” qəzetində jurnalist Can Mikalessinin Ermənistan-Azərbaycan münaqişəsi, xüsusilə də aprel ayında təmas xəttində baş vermiş hadisələrlə bağlı erməni tərəfinin mövqeyini əks etdirən ölkəmizə qarşı qərəzli və iftira xarakterli “Unudulmuş müharibənin postları arasında səyahət” adlı məqaləsi dərc edilmişdir. Müəllifin məqaləsi onun Azərbaycanın işğal olunmuş ərazilərinə qanunsuz səfərinin ardınca dərc olunmuşdur.

Bununla əlaqədar Azərbaycanın İtaliyadakı səfiri Məmməd Əhmədzadənin “Il Giornale” qəzetinin redaksiyasına ünvanladığı cavab məktubu bir sıra ixtisarlarla işıq üzü görmüşdür.

M.Əhmədzadə beynəlxalq ictimaiyyətin Dağlıq Qarabağı Azərbaycanın ayrılmaz tərkib hissəsi kimi tanıdığını, Ermənistan silahlı qüvvələrinin Azərbaycanın Dağlıq Qarabağ regionu və onun ətrafındakı 7 rayonunu 20 ildən artıq müddətdə işğal altında saxladığını, bir milyondan çox azərbaycanlının, Ermənistanın həyata keçirdiyi etnik təmizləmə siyasəti nəticəsində qaçqın və məcburi köçkün vəziyyətinə düşdüyünü, işğal olunmuş ərazilərimizdə məqalədə yanılış şəkildə “respublika” kimi təqdim edilmiş, əslində isə heç bir ölkə, o cümlədən Ermənistanın özü tərəfindən də belə tanınmamış qondarma qeyri-qanuni rejimin yaradıldığını qeyd etmişdir.

2 aprel tarixində təmas xəttində hərbi əməliyyatların məhz Ermənistan silahlı qüvvələri tərəfindən başlanıldığına dair çoxsaylı dəlillərin olduğunu qeyd edən M.Əhmədzadə, Azərbaycan tərəfindən mülki əhali arasındakı itkilər və mülki obyektlərə dəymiş ziyan, ASALA terrorçu təşkilatının üzvlərinin Ermənistan silhalı qüvvələri tərkibində döyüşməsi, Azərbaycana qarşı Ermənistan ordusu tərəfindən kimyəvi silahlardan istifadə edilməsi və nüvə silahından istifadə ilə təhdid edilməsi kimi faktları oxucuların diqqətinə çatdırmışdır.

M.Əhmədzadə qeyd etmişdir ki, bölgədə gərginliyə əsas səbəb Azərbaycan ərazilərinin işğalı və Ermənistan silahlı qüvvələrinin işğal olunmuş ərazilərdə yerləşdirilməsidir və Ermənistan bu faktları ört-basdır etmək məqsədilə mövzu ilə bağlı geniş dezinformasiya kampaniyası həyata keçirir. Azərbaycan diplomatı əlavə etmişdir ki, Ermənistan qoşunlarının Azərbaycanın işğal olunmuş ərazilərindən dərhal, tamamilə və qeyd-şərtsiz çıxarılmasını tələb edən çoxsaylı beynəlxalq sənədlər, o cümlədən BMT TŞ-nin 4 qətnaməsi yerinə yetirilmir.

M.Əhmədzadənin “Il Giornale” qəzetində dərc edilmiş cavab məktubu ilə buradan tanış ola bilərsiniz:

http://rome.mfa.gov.az/files/file/Giornale10.06_Azerbaigian.pdf

növbəti xəbər əvvəlki xəbər